Tetun: Leovigildo Amaral Pereira. Ministru MAE, Dr. Miguel P. de Carvalho ho nia Vise Lino de Jesus Torrezão fó Posse ba Administrador Munisipiu Ainaro Leovigildo A. Pereira, Serimonia ne'e partisipa husi Membru VIII Guvernu, Membru Parlamentu,Veteranus,Partidus Politik, Tais Mutin e Tais Metan,no autoridades hamutuk ho kargu xefis, iha edifisiu Administrasaun Ainaro.

Tuir Ministru Administrasaun Estatal (MAE), Dr. Miguel P. de Carvalho, iha nia diskursu hateten Governu Sentral sei garante no fó apoiu tomak ba nia representante no servisu munisipais iha Munisipiu Ainaro atu bele hala’o funsaun estadu nian ho di’ak, liu husi kapasitasaun ba rekursu humanus iha Munisipiu Ainaro maibé ida ne’e deit sei la to’o nune’e sei garante atu iha rekursu finanseira ne’ebé mak naton atu administrador hala’o dezenvolvimentu iha Munisipiu Ainaro bele la’o di’ak liu tan. “Governu Sentral sei garante Rekursu no Finanseira ne’ebé sufisiente no ha’u mos konvida deputadu sira ne’ebé tur iha ne’e atu haré katak ba munisipiu sira agora la hanesan ona ho tinan 2015 ba kotuk, tinan 2016 mai oin to’o agora ne’e la hanesan, tamba iha kompetensia ne’ebé barak liu maibé kompetensia sira ne’e faltas de meus tantu rekursu humanu ho finanseru no Governu sentral ho Parlamentu Nasional mak bele iha kompetensia ba ida ne’e” hateten Ministru iha Ainaro. Ministru haktuir tan Administrador sira exerse kompetênsia sira ne’ebé governu deskonsentra ona ba iha munisípius hanesan Edukasaun, Saúde, Seguransa Alimentar, Obras Públikas no Transportes, Agua, Saneamento no Ambiente, Seguransa Alimentar, Agrikultura, gestaun Merkadu no Turismu, Asaun Sosial, Gestaun Desastre Naturais no Protesaun Sivil, Registus Notariadu, e servisus kadastrais no apoiu ba organizasaun naun governamentais no organizasaun komunitárias sira. “Administrador fóun tenki promove no insentiva partisipasaun sívika konstrutivu ba Sidadaun sira iha Munisípiu ida-idak bele hasés-an husi divizionizmu sira katak devizionismu ne'e impede dezenvolvimentu lokál tamba ne'e governu nia metas mak atu asegura dezenvolvimentu iha Munisipius” Ministru hatutan, 25/02/2021. Ministru MAE, Dr. Miguel, representa governu hato'o agradese wain ba kontribuisaun bo'ot husi Administrador Sessante, Albertino Araujo , ne’ebé remata ona ninia mandatu ho di’ak.

Entretantu Ministru mos hato’o mensajen iha nia diskursu ba populasaun Munisipiu Ainaro katak se deit mak sai administrador munisipiu, liafuan sira ne’ebé maka hato’o husi komunidade katak Administrador troka hela de’it maibé Ainaro mak hanesan ne’e nafatin, tamba ne’e nia husu pelumenus ba tinan lima mai tan tenke iha mudansa, maibé la’os Administrador de’it nia servisu presija mos apoiu tomak husi komunidade Munisipiu Ainaro nian.